Urban News

  • Increase font size
  • Default font size
  • Decrease font size
Nagara Seithigal - News Papers

சென்னையின் குடிநீர் பிரச்சினையை போக்குவதற்காக குவாரியில் இருந்து தண்ணீர் எடுக்கும் பணி: அமைச்சர்கள், அதிகாரிகள் நேரில் ஆய்வு

Print PDF

தி இந்து        11.06.2017

சென்னையின் குடிநீர் பிரச்சினையை போக்குவதற்காக குவாரியில் இருந்து தண்ணீர் எடுக்கும் பணி: அமைச்சர்கள், அதிகாரிகள் நேரில் ஆய்வு

மாங்காடு அருகேயுள்ள சிக்கராயபுரம் கல் குவாரியில் இருந்து குடிநீருக்காகத் தண்ணீர் எடுக்கும் பணிகளைப் பார்வையிடும் உள்ளாட்சித் துறை அமைச்சர் எஸ்.பி.வேலுமணி, ஊரக வளர்ச்சித் துறை அமைச்சர் பெஞ்சமின் உள்ளிட்டோர்.
மாங்காடு அருகேயுள்ள சிக்கராயபுரம் கல் குவாரியில் இருந்து குடிநீருக்காகத் தண்ணீர் எடுக்கும் பணிகளைப் பார்வையிடும் உள்ளாட்சித் துறை அமைச்சர் எஸ்.பி.வேலுமணி, ஊரக வளர்ச்சித் துறை அமைச்சர் பெஞ்சமின் உள்ளிட்டோர்.

சென்னையின் குடிநீர் பிரச் சினையை போக்குவதற்காக கல் குவாரியில் இருந்து தண்ணீர் எடுக்கும் பணி நடைபெற்று வருகிறது. இப்பணியை நேற்று அமைச்சர்கள் ஆய்வு செய்தனர்.

சென்னைக்கு குடிநீர் வழங்கும் செம்பரம்பாக்கம், சோழவரம், பூண்டி, புழல் ஏரிகள், வறட்சி காரணமாக வறண்டுள்ளன. இதனால் சென்னையில் குடிநீர் தட்டுப்பாடு ஏற்பட்டுள்ளது. இப்பிரச்சினையைப் போக்க கல் குவாரிகளில் இருக்கும் தண்ணீரை பயன்படுத்த தமிழக அரசு முடிவு செய்தது. இதுகுறித்து நடத்தப்பட்ட ஆய்வில், குவாரி தண்ணீரை குடிக்க பயன்படுத்தலாம் என்று தெரியவந்தது. இதையடுத்து மாங்காடு அருகேயுள்ள சிக்கராயபுரம் கல் குவாரியில் இருந்து தண்ணீர் எடுக்க முடிவு செய்யப்பட்டது. இந்த குவாரியில் இருந்து குழாய் மூலம் தண்ணீர் எடுக்கும் பணி தற்போது நடைபெற்று வருகிறது. உள்ளாட்சித் துறை அமைச்சர் எஸ்.பி. வேலுமணி, ஊரக வளர்ச்சி துறை அமைச்சர் பெஞ்சமின் ஆகியோர் நேற்று இந்த பணிகளை நேரில் சென்று ஆய்வு செய்தனர்.

அமைச்சர் தகவல்

பின்னர் அமைச்சர் எஸ்.பி. வேலுமணி செய்தியாளர்களிடம் கூறியதாவது:

145 வருடங்களுக்கு பிறகு தமிழகத்தில் தற்போது கடும் வறட்சி ஏற்பட்டுள்ளது. தமிழகத்தில் 63 சதவீதம் மழை குறைந்துள்ளது. சென்னையின் குடிநீர் தேவையை சமாளிக்க சிக்கராயபுரம் கல் குவாரியில் இருந்து தண்ணீர் எடுத்து சுத்திகரிக்கப்பட்டு சென்னை மக்களுக்கு வழங்கப்படுகிறது. அதேபோல் திருவள்ளூர் மாவட்டத்தில் 100க்கும் மேற்பட்ட விவசாய கிணறுகளை வாடகைக்கு எடுத்து 7ஆயிரம் நடைகள் லாரி மூலம் தண்ணீர் விநியோகம் செய்யப்பட்டு வருகிறது. கல் குவாரியில் இருந்து தண்ணீர் எடுக்கும் திட்டத்துக்கு ரூ.13.63 கோடி செலவானது. மேலும் 20 நாட்களில் இந்த பணி முடிவடைந்தது. இந்த திட்டத்துக்கு ராட்சத மோட்டார் பம்பு அமெரிக்காவில் இருந்து இறக்குமதி செய்யப்பட்டது. இது சரித்திர சாதனை திட்டம்.

தமிழக அரசு நீர்நிலைகளை தூர்வாரும் பணியை செய்து வருகிறது. இது மக்கள் மத்தியில் நல்ல வரவேற்பை பெற்றுள்ளது. இதனால் திமுகவினரும் நீர்நிலைகளை தூர்வாரும் பணியை செய்கின்றனர். அவர்கள் ஏரியில் உள்ள செடி கொடிகளை மட்டுமே அகற்றுகின்றனர். அவர்கள் ஆட்சியில் இருந்தபோது நீர்நிலைகளை தூர்வாரவில்லை. பத்திரிகையில் செய்தி வர வேண்டும் என்பதற்காகவே தூர்வாரும் பணியை செய்கின்றனர்.

இவ்வாறு அவர் கூறினார்.

ஆய்வின்போது மாவட்ட ஆட்சியர் பா.பொன்னையா, பெரும்புதூர் எம்.பி. கே.என்.ராமச்சந்திரன், எம்.எல்.ஏ. பழனி, சென்னை குடிநீர் வாரிய மேலாண்மை இயக்குநர் அருண்ராய் உள்ளிட்ட பலர் உடன் இருந்தனர்.

 

சென்னை மாநகராட்சி சார்பில் உலக குழந்தை தொழிலாளர் ஒழிப்பு தின உறுதிமொழி ஏற்பு

Print PDF

தி இந்து         13.06.2017

சென்னை மாநகராட்சி சார்பில் உலக குழந்தை தொழிலாளர் ஒழிப்பு தின உறுதிமொழி ஏற்பு

சென்னை மாநகராட்சி சார்பில், உலக குழந்தைத் தொழிலாளர் ஒழிப்பு தின உறுதிமொழி நேற்று ஏற்கப்பட்டது.

கடந்த 2011-ல் எடுக்கப்பட்ட மக்கள் தொகை கணக்கெடுப்பின்படி, இந்தியாவில் ஒரு கோடியே 10 லட்சம் குழந்தைத் தொழிலாளர்கள் (5 முதல் 14 வயதுக்கு உட்பட்டவர்கள்) உள்ளனர். அதில் ஊரகப் பகுதியில் 81 லட்சம் பேரும், நகரப் பகுதியில் 20 லட்சம் பேரும் உள்ளனர். அதிகபட்சமாக உத்தரபிரதேச மாநிலத்தில் 20 லட்சம் குழந்தைத் தொழிலாளர்கள் உள்ளனர். அதற்கு அடுத்தடுத்த இடங்களில் பிஹார், ராஜஸ்தான், மத்திய பிரதேசம், மஹாரஷ்டிரம் ஆகிய மாநிலங்கள் உள்ளன.

நாட்டின் எதிர்கால தூண்களான குழந் தைகளை, இளம் வயதில் பள்ளிக்கு அனுப்பாமல், வேலைக்கு அனுப்புவதைத் தடுக்கும் வகையில், பொதுமக்கள் மத்தி யில் விழிப்புணர்வு ஏற்படுத்தும் விதமாக, ஆண்டுதோறும் ஜூன் 12-ம் தேதி உலக குழந்தைத் தொழிலாளர் ஒழிப்பு தினமாக கடைபிடிக்கப்படுகிறது. இதையொட்டி, குழந்தைத் தொழிலாளர் முறை ஒழிப்பு உறுதிமொழி ஏற்கும் நிகழ்ச்சி சென்னை மாநகராட்சியில் நேற்று நடைபெற்றது. அதில் சென்னை மாநகராட்சி ஆணையர் தா.கார்த்திகேயன் பங்கேற்று, 14 வயதுக்கு உட்பட்ட குழந்தைகளை பள்ளிக்கு அனுப்ப வேண்டும். பணிக்கு அனுப்புவதைத் தடுக்க வேண்டும் என்ற உறுதிமொழியை வாசிக்க, மாநகராட்சி அதிகாரிகளும், பணி யாளர்களும், உறுதிமொழி ஏற்றுக் கொண் டனர். நிகழ்ச்சியில் மாநகராட்சி துணை ஆணையர்கள் எம்.கோவிந்தராவ், ஆர்.லலிதா, எம்.விஜயலட்சுமி ஆகியோர் கலந்துகொண்டனர்.

காவல் ஆணையர்

குழந்தை தொழிலாளர் ஒழிப்பு தினத்தை முன்னிட்டு சென்னை காவல் ஆணையர் ஏ.கே விஸ்வநாதன் தலைமையில் காவல் ஆணையர் அலுவலகத்தில் காவல் அதிகாரிகள் மற்றும் அமைச்சுப் பணி யாளர்கள் குழந்தை தொழிலாளர் ஒழிப்பு நாள் உறுதி மொழி ஏற்றுக்கொண்டனர்.

நிகழ்ச்சியில் கூடுதல் காவல் ஆணையர் எஸ்.என்.சேஷசாயி, துணை ஆணையர்கள் அ.ராதிகா, ஆர்.திருநாவுக்கரசு, எஸ்.விமலா, சரவணன் உள்பட பலர் கலந்து கொண்டனர்.

 

திடக்கழிவு மேலாண்மையில் சாதிக்கிறது மதுக்கரை பேரூராட்சி: வளங்களை மீட்க வழிகாட்டுகிறது ஒரு குப்பைக் கிடங்கு

Print PDF

தி இந்து              13.06.2017

திடக்கழிவு மேலாண்மையில் சாதிக்கிறது மதுக்கரை பேரூராட்சி: வளங்களை மீட்க வழிகாட்டுகிறது ஒரு குப்பைக் கிடங்கு

மட்கும் கழிவுகளால் தயாராகும் உரப் படுக்கை
மட்கும் கழிவுகளால் தயாராகும் உரப் படுக்கை

குப்பைக்கிடங்கு என்றால் மலைபோல குவிந்திருக்கும் குப்பை, துர்நாற்றம், சுகாதாரக் சீர்கேடு ஆகியவை தான் நினைவுக்கு வரும். ஆனால் இந்த பொதுவான கண்ணோட்டத்தை பொய்யாக்கியுள்ளது கோவை மதுக்கரை பேரூராட்சியின் வளம் மீட்பு பூங்கா.

ஆம், இங்கு வளங்களை மீட்டுத் தரக்கூடிய இடமாக ஒரு குப்பைக்கிடங்கு மாற்றப்பட்டுள் ளது. மட்கும் குப்பைகளில் இருந்து இயற்கையான மண்புழு உரம், அதன் தரத்தை நிரூபிக்க வளமான காய்கறித் தோட்டம், பிளாஸ்டிக் கழிவுகளை தார் சாலைக்கான மூலப்பொருட்களாக மாற்றும் திட்டம் என, உள்ளே வரும் அத்தனை கழிவுகளையும், பயனுள்ள பொருளாக மாற்றி அனுப்புகிறது இந்த வளம் மீட்பு பூங்கா.

குப்பைக் கிடங்குகளால் ஏற்படும் பிரச்சினைகளை சமாளிக்க, தமிழகத்தில் 2013-14-ம் ஆண்டில் வளம் மீட்பு பூங்கா திட்டம் அறிமுகப்படுத்தப்பட்டது. குப்பையைத் தரம் பிரித்து, மறுசுழற்சி மூலம் அதை வேறு பயன்பாட்டுக்கு கொண்டு வரவும், சூழல் மாசுபாட்டைத் தடுக்கவும் திட்டமிடப்பட்டு 77 பேரூராட்சிகளில் இத்திட்டத்தை செயல்படுத்த அரசு உத்தரவிட்டது. அதில் ஒன்றாக ரூ.57.25 லட்சம் நிதியில் தொடங்கப்பட்டதுதான் கோவை மதுக்கரை சிறப்பு நிலை பேரூராட்சியின் வளம் மீட்பு பூங்கா.

பேரூராட்சிப் பகுதியில் உள்ள 8300 வீடுகளில் இருந்து மட்கும், மட்காத குப்பையை தனித்தனியாக சேகரித்து, துப்புரவுத் தொழிலாளர்கள் மூலம் இந்த பூங்காவுக்கு கொண்டு வரப்படுகிறது. பின்னர், மீண்டும் ஒருமுறை குப்பை தரம் பிரிக்கப்பட்டு, மட்கும் குப்பையை 60 படுக்கைகளில் குவித்து, தேவையான இயற்கை மூலப் பொருட்கள் சேர்த்து 45 நாட்களில் இயற்கை உரம் தயாராகிறது. பிறகு, சலித்து தூய்மைப்படுத்தி விற்பனைக்கு தயாராக்கப்படுகிறது. இதேபோல, மட்காத பிளாஸ்டிக் கழிவுகளை துல்லியமாக பிரித்தெடுத்து, இயந்திரங்கள் மூலம் சிறு, சிறு துண்டுகளாக வெட்டி பிளாஸ்டிக் தார் சாலைக்கான மூலப் பொருள் தயாரிக்கப்படுகிறது. மற்றொருபுறம், 18 தொட்டிகளில் தரம் மிகுந்த மண்புழு உரம் தயாராகிறது.


பண்ணைகளை பார்வையிடும் அலுவலர்கள்

அமோக விளைச்சல்

தயாராகும் உரங்களின் தரத்தை நிரூபிக்க இவர்கள் தேர்வு செய்த முறைதான் உச்சகட்டம். மொத்தமுள்ள 1.10 ஏக்கர் நிலத்தில் குப்பை தரம் பிரிப்பு, உரத் தயாரிப்புக்கு போக, மீதமுள்ள இடம் அனைத்தையும் பசுமை நிறைந்த விளைநிலமாக மாற்றியுள்ளனர் இங்குள்ள தொழி லாளர்கள். தேர்ந்த விதைகளை விதைத்து, தாங்கள் தயாரித்த உரத் தையே அதில் இட்டு இயற்கை காய் கறிகளை அறுவடை செய்கிறார்கள். பார்வையிட வருவோருக்கு அங்கு விளைந்த காய்கறிகளை இலவசமாக கொடுத்து உதவுகின்றனர் இங்குள்ள துப்புரவுத் தொழிலாளர்கள்.

மக்கள் பிரதிநிதிகள் இல்லாத தால் பல இடங்களில் உள்ளாட்சி நிர்வாகச் செயல்பாடுகள் கேள்விக்குள்ளாக்கப்பட்டு வரும் நிலையில், அலுவலர்கள், தொழிலாளர்கள் முயற்சியாலேயே இங்கு திடக்கழிவு மேலாண்மை திறம்பட நடக்கிறது.

பேரூராட்சி செயல் அலுவலர் டி.செல்வராஜ் கூறும்போது, ‘பேரூராட்சியில் 35,000 மக்கள் வசிக்கின்றனர். நாள் ஒன்றுக்கு 7.39 டன் குப்பை சேகரமாகிறது. கொஞ்சம் கூட வீணாக்காமல் தரம் பிரிக்கிறோம். 60 சதவீத மட்கும் குப்பை கிடைப்பதால் உரத் தயாரிப்பு எளிதாக இருக்கிறது. மட்காத பிளாஸ்டிக் கழிவை தார் சாலைக்கு பயன்படுத்த திட்டமிட்டுள்ளோம். மக்கள் கொடுக்கும் ஒத்துழைப்பே இத்திட்டத்தின் வெற்றி’ என்றார்.

திட்டம் விரிவடையும்

சுகாதார அலுவலர் எம்.திருவாசகம் கூறும்போது, ‘சுகாதாரத்தை காக்க வேண்டும் என்பதால், சுற்றிலும் 100 முள்ளில்லா மூங்கில்கள் வைத்து துர்நாற்றத்தை அறவே தடுத்துள்ளோம். நாள் ஒன்றுக்கு 200 கிலோ இயற்கை உரமும், 25 கிலோ மண்புழு உரமும் கிடைக்கிறது. இந்த உரங்களை வைத்தே வெண்டை, கத்தரி, மிளகாய், தக்காளி, புடலங்காய், பூசணி, முள்ளங்கி, மாதுளை, வாழை, மரவள்ளி ஆகியவற்றை பயிரிட்டு உரத்தின் தரத்தை நிரூபிக்கிறோம்.

உரத் தயாரிப்பால் மண் மாசடையவில்லை என்பதை மாசுக்கட்டுப்பாட்டு வாரியம் உறுதி செய்துள்ளது. உரத்தின் தன்மையை தனியார் ஆய்வுகள் நிரூபித்துள்ளன. வேளாண் துறையின் அங்கீகாரம் கிடைத்ததும், குறைந்த விலையில் விற்பனைக்கு கொண்டு வருவோம். பேரூராட்சிக்கு கூடுதலாக 2.5 ஏக்கர் நிலம் ஒதுக்கப்பட்டுள்ளது. அங்கு இத்திட்டத்தை விரிவுபடுத்தத் திட்டமிட்டுள்ளோம்’ என்றார்.

குப்பையை மலை போலக் குவித்து வைத்துவிட்டு பிரச்சினைகளை எதிர்கொள்ள முடியாமல் தவிக்கும் உள்ளாட்சி நிர்வாகங்களுக்கு, இந்த வளம் மீட்பு பூங்கா ஒரு சரியான பாடம்.

 
  • «
  •  Start 
  •  Prev 
  •  1 
  •  2 
  •  3 
  •  4 
  •  5 
  •  6 
  •  7 
  •  8 
  •  9 
  •  10 
  •  Next 
  •  End 
  • »


Page 1 of 3982