Urban News

திருக்கோவிலூர், செப். 23: திருக்கோவிலூரில் புதிய பஸ் நிலையம் அமைப்பதற்கான இடத்தை மாவட்ட ஆட்சியர் ஆர்.பழனிச்சாமி புதன்கிழமை நேரில் பார்வையிட்டார்.

வளர்ந்து வரும் திருக்கோவிலூரில் போதிய அளவுக்கு பஸ் நிலையம் இல்லாத நிலையில் நாளுக்குநாள் ஏற்படும் போக்குவரத்து நெரிசல் மற்றும் கூட்ட நெரிசலை கட்டுப்படுத்தும் வகையில் புதிய பஸ் நிலையம் அமைக்க வேண்டுமென பொதுமக்கள் தொடர்ந்து கோரிக்கை விடுத்து வந்தனர்.

இந் நிலையில் திருக்கோவிலூர் பஸ் நிலையத்துக்கு மேற்கு திசையில் ரிஷிவந்தியம் சட்டமன்ற உறுப்பினர் எஸ்.சிவராஜிக்கு சொந்தமான சுமார் 5 ஏக்கர் நிலத்தை புதிய பஸ் நிலையம் அமைப்பதற்கு தானமாக கொடுப்பதாக உறுதியளித்தார்.

இதையடுத்து மாவட்ட ஆட்சியர் ஆர்.பழனிச்சாமி, மற்றும் மாவட்ட வருவாய் அலுவலர் கதிரவன், உயர்கல்வித்துறை அமைச்சர் க.பொன்முடி ஆகியோர் திருக்கோவிலூரில் புதிய பஸ் நிலையம் அமைப்பதற்காக இந்த இடத்தை கடந்த 2 மாதங்களுக்கு முன் நேரில் பார்வையிட்டனர்.

இந் நிலையில் மீண்டும் புதன்கிழமை திருக்கோவிலூருக்கு வந்த மாவட்ட ஆட்சியர் ஆர்.பழனிச்சாமி இந்த இடத்துக்குச் சென்று வரைபடத்தைக் கொண்டு அதற்கான இடங்களை ஆய்வு செய்தார்.

பின்னர் இந்த புதிய பஸ் நிலையம் அமைப்பது குறித்த வேலைகளைத் தொடங்க உத்தரவிட்டார்.

பெரம்பலூர், செப். 22: பெரம்பலூர் நகராட்சிப் பகுதிகளில் பொதுமக்களின் வசதிக்காக, துறைமங்கலம் முதல் பழைய பேருந்து நிலையம் வரை பேருந்து நிறுத்தத்துக்கான இடங்களை மாவட்ட ஆட்சியர் எம். விஜயகுமார் நேரில் பார்வையிட்டு செவ்வாய்க்கிழமை ஆய்வு செய்தார்.

பெரம்பலூர் நகராட்சிப் பகுதியில் நாளுக்கு நாள் அதிகரித்து வரும் போக்குவரத்து நெரிசலைக் கட்டுப்படுத்தவும், பயணிகளின் தேவைகளைப் பூர்த்தி செய்யும் வகையில், பெரம்பலூர் நகராட்சிக்கு உள்பட்ட பகுதிகளில் பேருந்து நிறுத்தத்துக்கான இடங்களை மாவட்ட ஆட்சியர் ஆய்வு செய்தார்.

பெரம்பலூர் துறைமங்கலம் மூன்று சாலை பகுதி, பொறியாளர் குடியிருப்புப் பகுதி, அரசு அலுவலர்கள் குடியிருப்புப் பகுதி, பாலக்கரை என்.பி.எஸ். கட்டடம் அருகில், கிருஷ்ணா திரையரங்கம், சங்குப்பேட்டை அங்கன்வாடி மையம், சமுதாயக் கூடம், ஆக்ஸிஸ் வங்கி, தலைமை அரசு மருத்துவமனை, கனரா வங்கி, நகராட்சி அலுவலகம், காமராஜர் வளைவு, நான்கு சாலை சந்திப்பு உள்ளிட்ட 10 இடங்களைப் பார்வையிட்டு பயணியர் நிழற்குடை அமைக்க ஆய்வு செய்தார்.

பின்னர் மாவட்ட ஆட்சியர் எம். விஜயகுமார் கூறியது:

தேர்வு செய்யப்பட்ட இடங்களில் முதல் கட்டமாக பெரம்பலூர் நகராட்சி மூலம் நிழற்குடை அமைக்கப்படும். போக்குவரத்தை சீரமைக்கும் வகையில், ஷேர் ஆட்டோக்கள் வரன்முறைக்கு உட்படுத்தப்படும். மேலும், நிழற்குடை அமைக்கத் தேர்வு செய்யப்பட்ட இடங்களில் விரைவில் பேருந்து நிறுத்தம் என்னும் விளம்பரப் பலகைகள் வைக்கப்படும் என்றார் அவர்.

இந்த ஆய்வின் போது, பெரம்பலூர் நகராட்சி ஆணையர் ராமகிருஷ்ணராஜன், வட்டாரப் போக்குவரத்து அலுவலர் செல்வம், ஆய்வாளர் சரவணபவன், செய்தி மக்கள் தொடர்பு அலுவலர் ம. ராஜேந்திரன் உள்ளிட்டோர் உடனிருந்தனர்.