Urban News

தினமணி            16.01.2014

மாநகராட்சி சுங்கச்சாவடி கட்டண வசூல்  தினமும் ரூ.3 லட்சம் வரை அதிகரிப்பு

மதுரை மாநகராட்சி உள்சுற்றுவட்டச்சாலையிலுள்ள 5 சுங்கச்சாவடிகளில் வாகனக்கட்டண வசூலில் முறைகேடுகள் தவிர்க்கப்பட்டதன் மூலம், தினமும் வசூல் தொகை ரூ.3 லட்சம் வரை அதிகரித்துள்ளது.

 மதுரை மாநகராட்சி மூலம் உத்தங்குடி முதல் திருமங்கலம் வரையிலான 21 கிமீ உள்சுற்றுவட்டச்சாலை பராமரிக்கப்பட்டு வருகிறது. இந்தச்சாலையில் உத்தங்குடி, சிவகங்கைச்சாலை சந்திப்பு, ராமநாதபுரம் சாலை சந்திப்பு, சிந்தாமணிச்சாலை சந்திப்பு, விமானநிலையம் சமீபம் ஆகிய 5 இடங்களில் சுங்கச்சாவடி அமைக்கப்பட்டு, கட்டணம் வசூலிக்கப்பட்டு வருகிறது.

 இந்தச் சாவடிகளில் பல ஆண்டுகளாக முறைகேடுகள் நடைபெற்று வருவதாகவும், தினமும் பல லட்சம் ரூபாய் வரை மறைக்கப்படுவதாகவும் புகார்கள் எழுந்தன. இது தொடர்பாக மாவட்ட நிர்வாகத்துக்கும் புகார்கள் சென்றதை தொடர்ந்து, முந்தைய ஆட்சியர் அன்சுல்மிஸ்ரா, காவல் கண்காணிப்பாளர் பாலகிருஷ்ணன் ஆகியோர் இணைந்து சோதனை நடத்தினர். இதில் சுங்கச்சாவடியில் முறைகேடுகள் நடப்பது கண்டறியப்பட்டு, சில ஊழியர்களும் கைது செய்யப்பட்டனர்.

 இதற்கு அப்போதைய மாநகராட்சி நிர்வாகமும், ஊழியர்களும் எதிர்ப்பு தெரிவித்தனர். இந்நிலையில், புதிதாக பொறுப்பேற்றுள்ள மாநகராட்சி ஆணையர் கிரண்குராலா சுங்கச்சாவடிகளில் சோதனை நடத்தி, முறையாக கட்டண வசூல் நடத்துமாறு ஊழியர்களை எச்சரித்தார். சம்பந்தப்பட்ட அலுவலர்களும் மாநகராட்சிக்கு இழப்பின்றி கட்டண வசூல் நடக்க உத்தரவிட்டார். அவ்வப்போது, தனி நபராக ஆணையாளரும் ஆய்வில் ஈடுபட்டு வருகிறார்.

 இதை தொடர்ந்து உள்சுற்றுவட்டச் சாலைகளிலுள்ள சுங்கவரி மையங்களில் வசூல் தொகை அதிகரித்துள்ளது. ஜனவரி முதல் தேதியிலிருந்து ஜனவரி 12-ம் தேதி வரையிலான காலக்கட்டத்தில் மட்டும், கட்டண வசூல் ரூ.73 லட்சத்து 98 ஆயிரத்து 985 கணக்கு காண்பிக்கப்பட்டுள்ளது. அதாவது, 5 சுங்கச் சாவடிகளிலும் ஜனவரி 1-ம் தேதி ரூ.5,99,340-ம், 2-ம் தேதி ரூ.5,86,960-ம், 3-ம் தேதி ரூ.6,05,940-ம், 4-ம் தேதி ரூ.6,07,995-ம், 5-ம் தேதி ரூ.5,26,780-ம், 6-ம் தேதி ரூ.5,76,605-ம், 7-ம் தேதி ரூ.6,02,055-ம், 8-ம் தேதி ரூ.6,02,165-ம், 9-ம் தேதி ரூ.6,07,480-ம், 10-ம் தேதி ரூ.6,69,490-ம், 11-ம் தேதி ரூ,7,60,040-ம், 12-ம் தேதி ரூ.6,54,135-ம் கணக்கில் காண்பிக்கப்பட்டுள்ளது. தொடர்ந்து, சராசரியாக இதே அளவில் கட்டண வசூல் நடைபெற்று வருவதாக கூறப்படுகின்றது. முன்பெல்லாம், இந்த 5 சுங்கச் சாவடிகளிலும் சேர்த்து தினமும் ரூ.2 லட்சம் முதல் ரூ.3 லட்சம் வரையில் மட்டுமே கணக்கில் காண்பிக்கப்பட்டு வந்தது குறிப்பிடத்தக்கது.

தினமணி               06.01.2014

நத்தம் பேருந்து நிலைய விரிவாக்க பணிகள் தொடக்கம்

நத்தம் பேருந்து நிலைய விரிவாக்கப் பணிகளுக்காக வனத்துறை இலாகாவிடம் இருந்து பெறப்பட்ட இடத்தில் இருந்த வனத்துறைக்குச் சொந்தமான கட்டடங்கள் இடிக்கப்பட்டு புதிய பேருந்து நிலைய அமைப்புக்கான வேலைகள் தொடங்கின.

 இப்போது இயங்கி வரும் பேருந்து நிலையத்தில் போதிய இடவசதி இல்லாததால் பேருந்துகள் வந்து செல்ல இடையூறாக இருந்து வருகிறது. நத்தத்தைச் சுற்றியுள்ள கிராமங்களில் இருந்து தினந்தோறும் நத்தத்தில் உள்ள பள்ளிகளுக்கு வந்து செல்லும் மாணவர்கள் மாலை நேரங்களில் பஸ்சில் ஏறுவதற்கு அவதி அடைந்து வருகிறார்கள். மேலும் வியாபாரம், அரசு அலுவலகங்கள், மருத்துவமனைகள் மற்றும் பல வேலைகளுக்காக வருபவர்களுக்கு புதிய பேருந்து நிலையத்தில் அனைத்து வசதிகளும் கிடைக்கும் என கிராம மக்கள் எதிர்பார்க்கின்றனர். இதற்காக 2 மாதங்களுக்கு முன் பேரூராட்சிக்கு 2 ஏக்கர் நிலத்தை வனத்துறை வழங்கியது. அந்த இடத்தில் சனிக்கிழமை கனரக இயந்திரங்களைக் கொண்டு பணிகள் தொடங்கின.